११ हजार बढी सवारीसाधन रौतहट ट्राफिक प्रहरीको कारबाहीमा, करोड बढी राजस्व संकलन

काठमाडौं  । ट्राफिक प्रहरीले गरेको कारबाहीमा रौतहट जिल्लाबाट १ करोड बढी राजस्व संकलन गरेको छ। 

रौतहट ट्राफिक प्रहरी कार्यालयले गत साउनदेखि चैत अन्तिमसम्म नियम विपरीत चलेका  ११ हजार ४८९ सवारी साधनलाई कारबाही गर्दै १ करोड ७ लाख ४६ हजार रुपैयाँ राजस्व संकलन गरेको हो।

उक्त ९ महिनाको अवधिमा जिल्लाभरमा भएका ५ सय ४९ दुर्घटना ३८ जनाको मृत्यु हुँदा ६६ जना गम्भीर घाइते भएका थिए। ती दुर्घटनामा ८ सय ३६ जना सामान्य घाइते भएको रौतहट ट्राफिक प्रहरीले जानकारी दिएको छ।

यसैगरी, दुर्घटना न्यूनीकरणका लागि गरेको प्रयासतर्फ रौतहट ट्राफिक प्रहरीले जिल्लाभरका विभिन्न स्य्हानमा २३ सय ९९ पटक ट्राफिक सचेतना कार्यक्रमको आयोजना गरेको थियो। जसबाट ५३ हजार ९३६ जना लाभान्वित भएको जिल्ला ट्राफिक प्रहरी कार्यालय रौतहटले जनाएको छ।