स्कुटर चोरीमा संलग्न रहेका ३ जना ट्राफिक प्रहरीको नियन्त्रणमा

काठमाडौं । ट्राफिक प्रहरीले स्कुटर चोरीमा संलग्न रहेको आरोपमा तीन जनालाई पक्राउ गरेको छ।

काठमाडौं उपत्यका ट्राफिक प्रहरीको टोलीले भक्तपुरबाट सुनसरीको धरान घर भई भक्तपुरको ठिमी बस्ने ३२ वर्षीय साजन तामाङ, सिन्धुपाल्चोकको ईन्द्रावती गाउँपालिका १ घर भई भक्तपुरको बोडे बस्ने २६ वर्षीय दावा शेर्पा र भक्तपुरको मध्यपुर ठिमी  नगरपालिका ६  बस्ने २७ वर्षीय रोजन थापालाई स्कुटर चोरीको आरोपमा पक्राउ गरेको हो।

वास्तविक नम्बर बागमती प्रदेश ०२- ०३७ प २४०७  रहेको स्कुटर नम्बर परिवर्तन गरी बागमती प्रदेश ०२-०४० प ०५२४  नम्बर राखी काठमाडौंको कागेश्‍वरी नगरपालिका ७ मा चलाईरहेको अवस्थामा साजनलाई ट्राफिक प्रहरीले फेला पारेको जानकारी दिएको छ। ट्राफिक प्रहरीका अनुसार उक्त स्कुटर सलिना कार्कीको रहेको खुल्न आएको छ । 

सोधपुछको क्रममा सो स्कुटर साजन र दावा मिलेर बिक्री गर्ने योजना बनाएको हुनाले दावालाई समेत ट्राफिक प्रहरीले नियन्त्रणमा लिएको थियो ।

 दावालाई  सोधपुछ गर्दा उक्त स्कुटर रोजनबाट लिएको बताएपछि रोजनलाई समेत भक्तपुरको मध्यपुर ठिमीबाट ट्राफिक प्रहरीले नियन्त्रणमा लिएको हो । 

रोजनलाई समेत सोधपुछ गर्दा सो स्कुटर  भक्तपुरको नलिनचोकका २७ बर्षीय सुजन गुरुङले दिएको भन्ने खुल्न आएपश्चात खोजी गर्ने क्रममा उनी बस्दै आएको ठाउँमा बा ६६ प ८७८५ नम्बरको स्कुटर प्रहरीले बरामद गरेको थियो । सो स्कुटर काठमाडौंको सानोगौचरणबाट हराएको भनि विकास लामाले काठमाडौं उपत्यका ट्राफिक प्रहरी कार्यालयमा निवेदन दिएका थिए । 

फरार रहेका सुजनको भने खोजी भइरहेको काठमाडौं उपत्यका ट्राफिक प्रहरी कार्यालयले जानकारी  दिएको छ । पक्राउ परेका तीनै जनालाई आवश्यक छानबिन तथा कारवाहीका लागि प्रहरी वृत्त मालिगाउँ पठाएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक दिपक गिरीले जानकारी दिएका छन् ।