१४ वर्षीय बालकको बीभत्स हत्या,कुहिएको अवस्थामा फेला पर्‍यो शव

काठमाडौं । १४ वर्षीय बालकको धारिलो हतियार प्रयोग गरी बीभत्स रुपले हत्या भएको छ । हत्या भएको अवस्थामा पाँच दिनपछि शव खोलाको पानीमा बरामद भएको छ ।

रौतहटको गरुडा नगरपालिका-८ स्थित चाँदीखोलामा  पछिल्लो ५ दिनदेखि हराइरहेका वृन्दावन नगरपालिक-७ बस्ने सुरुजराय यादवको छोरा वर्ष १४ को कृष्णप्रसाद यादवको शव पानीमा घोप्टो अवस्थामा आज बिहान ९ बजे फेला परेको इलाका प्रहरी कार्यालय गरुडाले जानकारी दिएको छ ।

घटनाको जानकारी प्राप्त हुना साथ डीएसपी कार्की सहितको टोली अनुसन्धानको लागि  घटनास्थलमा खटिएको छ। बरामद शवको प्रकृति हेर्दा कर्तव्य गरी हत्या गरिएको जस्तो देखिएको डीएसपी कार्कीले जानकारी दिएका छन् । बालकको पेट र कन्चटमा गहिरो घाउ खत देखिएकाले धारिलो हतियारले प्रहार गरेको हुन सक्ने अनुमान रहेको प्रहरीले जनाएको छ।

शवमा कीरा लागिसकेको अवस्थामा आज बरामद भएको तथा पोष्टमार्टमका लागि प्राथमिक स्वास्थ्य केन्द्र चन्द्रनिाहपुर पठाइएको प्रहरीले जनाएको छ। गत ६ गते अपरान्ह ४ बजे घरबाट बिर्ता गाउँ जान्छु भनी उक्त बालक आफ्नै मोटरसाईकल चढेर निस्किएका थिए ।

त्यसको ३ दिनसम्म बालक घरमा फिर्ता नआउँदा गत ९ गते पीडित परिवारले जिल्ला प्रहरी कार्यालय जेष्ठ नागरिक महिला तथा बालबालिका सेल गरुडामा खोजतलासको लागि निवेदन दिएको थियो। घटना सम्बन्धी थप अनुसन्धान भइरहेको तथा बालकले घरबाट लिएर गएको मोटरसाइकल हालसम्म फेला नपरेको इलाका प्रहरी कार्यालय गरुडाले जानकारी दिएको छ ।