३० हजार घुस लिएर पक्राउ परेका सई खड्काविरुद्ध मुद्दा दायर

काठमाडौँ । घुस लिएको आरोपमा पक्राउ परेका नेपाल प्रहरीका नायब निरीक्षक (सई) खिम बहादुर खड्काविरुद्ध विशेष अदालतमा मुद्दा दायर भएको छ।

अख्तियार दुरुपयोग अनुसन्धान आयोगले भारतबाट ल्याइएको सामन भन्सार छल्न सहयोग गरिदिने भन्दै घुस लिएको आरोपमा पक्राउ परेका रुपन्देहीको प्रहरी चौकी दुर्गौलियामा कार्यरत सई खड्काविरुद्ध विशेष अदालतमा मुद्दा दायर गरेको जानकारी दिएको छ।

अख्तियारका अनुसार सई खड्काले दुर्गौलिया नाका हुँदै ल्याइने अवैध सामाग्रीलाई नेपाल छिराउन पास गरिदिने भन्दै ३० हजार रुपैयाँ घुस लिएको आरोप रहेको छ।

सई खड्कालाई अख्तियार घुस रकम लिइसकेको अवस्थामा नियन्त्रणमा लिएको थियो। अख्तियारले खड्काविरुद्ध  विशेषमा मुद्दा दायर गर्दै ३० हजार रुपैयाँ बिगो कायम गरी ४ महिना कैद सजायको माग गरिएको जनाएको छ।