बर्दियामा मोटरसाइकल दुर्घटना हुँदा एकको मृत्यु, अर्का एक घाइते

बर्दिया । बर्दियामा भएको सवारी दुर्घटनामा ३० वर्षीय युवकको मृत्यु भएको छ। दुर्घटनामा अर्का एक जना घाइते भएका छन् । 

राजापुर नगरपालिका-१०  आनन्दनगरमा मानपुर टपराबाट ओराली जाँदै गरेको भे१२प ३८३४ नम्बरको मोटरसाइकल गएराति दुर्घटना हुँदा मधुवन नगरपालिका-२ का ३० वर्षीय रामबहादुर थारुको मृत्यु भएको बर्दिया प्रहरीले जनाएको छ।

प्रहरीका अनुसार दुर्घटनामा गम्भीर घाइते भएका मोटरसाइकल चालक रामबहादुरको उपचारका क्रममा जिल्ला अस्पताल गुलरियामा मृत्यु भएको जिल्ला प्रहरी बर्दियाले जानकारी दिएको छ।

दुर्घटनामा परेर घाइते भएका मोटरसाइकलको पछाडि सवार अर्का व्यक्तिको जिल्ला अस्पतालमै उपचार भइरहेको प्रहरीले जनाएको छ भने घटनाबारे अनुसन्धान गरिरहेको जानकारी दिएको छ।