चिर्पटले हानेर भाइले गरे आफ्नै दाइको हत्या

पोखरा । आफ्नै सहोदर दाइको भाइले हत्या गरेका छन् । म्याग्दीको धवलागिरी गाउँपालिका वडा नं.५ मलम्पार रुटबाङटोलका ४२ बर्षीय धनबहादुर छन्त्यालको भाइले हत्या गरेको प्रहरीले जानकारी दिएको छ।  

बुधबार राति सहोदर भाइ सोमबहादुर छन्त्यालले टाउकोमा चिर्पट प्रहार गर्दा दाइ धनबहादुरको घटनास्थलमै मृत्यु भएको जिल्ला प्रहरी कार्यालय म्याग्दीले जनाएको छ ।

सोमबहादुर साइला र धनबहादुर माइला सहोदर दाजुभाइ हुन् ।घरायसी विवादमा दाजुभाइबीभ झगडा भएको प्रहरीले जनाएको छ ।

धनबहादुरको हत्यापछि भागेका सोमबहादुरलाई गएराति नै स्थानीयको सहयोगमा प्रहरीले पक्राउ गरिसकेको जनाएकोछ । मृतक धनबहादुरका श्रीमती र दुई छोरी छन् ।