भारतबाट आउँदै गर्दा सीमामै हराएका सल्यानका सुरतलाई भेटायो बर्दिया प्रहरीले, लगाइयो जिम्मा आफन्तको

बर्दिया । जिल्ला प्रहरी कार्यालय बर्दियाले हराएका एक व्यक्तिलाई फेला पारेर आफन्तको जिम्मा लगाएको छ।

सल्यानको सेजवाल टाकुरा-५ घर भएर भारतमा रोजगारी गरेर फर्किने क्रममा हराएका ४३ वर्षीय सुरत गिरीलाई फेला पारेको बर्दिया प्रहरीले जानकारी दिएको छ।

भारतबाट आउँदै गरेका गिरी बर्दिया र भारतको सीमाबाट हराएपछि खोजतलासका क्रममा इलाका प्रहरी कार्यालय मथुराबाट खटिएको टोलीले फेला पारेको जिल्ला प्रहरी कार्यालय बर्दियाले जनाएको छ। 

प्रहरीको टोलीले गिरीलाई गुलरिया नगरपालिका-१० कालाबन्जार सीमा क्षेत्रबाट फेला पारेर आज बाँकेको डुडुवा गाउँपालिका-५ बस्ने उनका ३७ वर्षीय मामा रमेश क्षेत्रीको जिम्मा लगाएको बर्दिया प्रहरीले जानकारी दिएको छ।