प्रहरी हिरासतभित्रै थुनुवाको मृत्यु

झापा । लागुऔषधसहित पक्राउ परेका एक थुनुवाको इलाका प्रहरी कार्यालय काँकडभिट्टाको हिरासतमा मृत्यु भएको छ ।

मृत्यु हुने थुनुवा मेचीनगर नगरपालिका-७ पालियाका २८ वर्षीय झकबहादुर खड्का रहेका छन् ।

खड्का ४ दिन अघि लागुऔषधसहित मेचीनगर-६ बाट पक्राउ परेका थिए । उनलाई जिल्ला अदालतबाट पाँच दिनको म्याद थप गरी इप्रका काँकडभिट्टाको हिरासतमा राखेर प्रहरीले थप अनुसन्धान गरिरहेको थियो ।

मंगलबार राति १ः४० बजे स्वास्थ्यमा समस्या आएपछि खड्कालाई उपचारका लागि धुलाबारीस्थित आम्दा अस्पताल पुर्याएको जिल्ला प्रहरी कार्यालयका प्रवक्ता कृष्णबहादुर चन्दले जानकारी दिए । खड्काको आज उपचारका क्रममा मृत्यु भएको उनले बताए ।