इटालियन पेस्तोलसहित एक युवक पक्राउ

झापा । झापा प्रहरीले 'मेड इन इटली' लेखेको पेस्तोलसहित एक युवकलाई पक्राउ गरेको छ।

जिल्ला प्रहरी कार्यालयबाट खटिएको टोलीले दमकबाट पेस्तोलसहित दमक नगरपालिका-८ का ३६ वर्षीय सञ्जिव गजमेरलाई पक्राउ गरेको हो।

प्रहरीले आज दमक नगरपालिका-५ मा गजमेर सवार को ३८ प ५६४९ नम्बरको स्कुटरलाई चेकजाँच गर्दा स्कुटरको अगाडीपट्टि लुकाएर राखेको अवस्थामा पेस्तोल भेटिएको जिल्ला प्रहरी कार्यालय झापाले जानकारी दिएको छ।

पक्राउ परेका गजमेरको साथबाट दुईथान पेस्तोलको म्याग्जिन पनि प्रहरीले  बरामद गरेको छ। झापा प्रहरीले यसबारेमा थप अनुसन्धान गरिरहेको जनाएको छ।