बोलेरो दुर्घटनामा एक जनाको मृत्यु, अर्का एक जना घाइते

काठमाडौं । जीप दुर्घटना हुँदा म्याग्दीका एक जनाको मृत्यु भएको छ । दुर्घटनामा  म्याग्दीको अन्नपूर्ण गाउँपालिका वडा नं.७ टिकोटका ६४ वर्षीय भीमबहादुर पाइजा पुनको मृत्यु भएको म्याग्दी प्रहरीले जानकारी दिएको छ।

दुर्घटनामा परेर गम्भीर घाइते भएका पुनको बेनी अस्पतालमा उपचारका क्रममा मृत्यु भएको जिल्ला प्रहरी कार्यालय म्याग्दीले जनाएको छ । सोही दुर्घटनामा घाइते भएका ४१ वर्षीय कुमार पुनको उपचार भइरहेको प्रहरीले जनाएको छ ।

आज  बेनी जाँदै  गरेको ग१ज ७९४५ नम्बरको बोलेरो जीप अन्नपूर्ण गाउँपालिका वडा नं. ७ टिकोटमा दुर्घटनामा परेको जिल्ला प्रहरी कार्यालय म्याग्दीका सूचना अधिकारी राजन रायमाझीले जानकारी दिएका छन् ।

भिरालो सडकमा रोकिराखेको जीप चिप्लिएर पछाडि गुडेर भिरबाट करिब ५० मिटर तल खसेको छ । जीप चालक ३६ वर्षीय केशव पुनलाई नियन्त्रणमा लिएर थप अनुसन्धान सुरु गरेको जनाएको छ।