भारतीय स्कारपियोमा तस्करी भइरहेको २ क्विन्टल बढी गाँजा बरामद

सुनसरी । सशस्त्र प्रहरीले गएराति सुनसरीको हरिनगर गाउँपालिका २ स्थित भुटाहा-घुस्की भित्री सडक खण्डको नर्कटियामा भुटाहाबाट घुस्कीतर्फ जादैँ गरेको गाडीबाट सशस्त्र प्रहरीले २२० किलो गाँजा बरामद गरेको छ । 

राति ९ बजेर २० मिनेटमा बीआर–११ टी १६०० नम्बरको भारतीय स्कारपियो गाडी सशस्त्र प्रहरी बल, नेपाल सुरक्षा बेश भुटाहाबाट सशस्त्र प्रहरी निरीक्षक ज्ञानेन्द्र राउतको कमाण्डमा खटिएको २ जनाको मोटरसाइकल गस्ती टोली र प्रहरी चौकी भुटाहाबाट खटिएका प्रहरी नायव निरीक्षक पर्वत रायमाझीको कमाण्डमा खटिएको २ जना गरी जम्मा चार जनाको संयुक्त टोलीलाई देखेर अन्दाजी ४०० मिटर अगाडि गाडी छाडी चालक फरार भएको सशस्त्रले जनाएको छ। 

स्कारपियो गाडी नियन्त्रणमा लिई सुरक्षा बेश भुटाहामा ल्याई आवश्यक चेकजाँच गर्दा प्रतिबन्धित लागू औषध गाँजा २२० केजी फेला परेको हुँदा उक्त स्कारपियो गाडी र गाँजा आवश्यक कारबाहीको लागि राति १० बजेर ४५ मिनेटमा प्रहरी चौकी भुटाहा सुनसरीमा बुझाएको छ ।