सोलुखुम्बुको थामे बाढीमा फसेका ७ जनाको उद्धार, एक जना सम्पर्कविहीन

सोलुखुम्बु । सोलुखुम्बुको खुम्बु पासाङल्हामु गाउँपालिका- ५ थामेमा आएको बाढीले एक दर्जन भन्दा बढी घर बगाएको छ  । साथै विद्यालय र क्लिनिकमासमेत क्षति पुगेको बताइएको छ । केही बेपत्ता भएको शंका गरिएको छ । बाढीमा फसेका ७ जनाको नेपाली सेनाले उद्धार गरेको छ।

थामे खोलामा एक्कासी बढेको बहावले उक्त क्षति भएको प्रहरीले जनाएको छ । प्रहरीले एक जना सम्पर्कविहीन भएको पुष्टि गरेको भए पनि थप केही बेपत्ता भएको हुन सक्ने शंका गरिएको छ । 

सुरक्षा निकायले उद्दारको काम जारी राखेको छ । स्थानीय प्रशासनले थामे खोलाको शिरमा रहेका हिमताल फुटेर या कुनै पहाड खसेर बाढी आएको हुन सक्ने जनाएको छ । 

थामेमा बाढी पसेको हुनाले उक्त क्षेत्रका ७ वटा घर अझै जोखिमपूर्ण अवस्थामा छन् । सञ्चार र विद्युत् सेवा प्रभावित भएकाले यकिन विवरण आउन सकेको छैन ।