युवतीलाई सामूहिक बलात्कार गरेको आरोपमा दुई कर्मचारीसहित तीन पक्राउ

बुटवल । रुपन्देहीमा एक युवतीलाई सामूूहिक बलात्कार गरेको आरोपमा प्रहरीले दुई जना कर्मचारीसहित तीन जनालाई पक्राउ गरेको छ। 

जिल्लास्थित कोटहीमाई गाउँपालिकामा कार्यरत कर्मचारी मनोहर चौधरी, उद्यम विकास सहजकर्ता मुकेश चौधरीसहित वडा नम्बर ३ का  बन्टी भन्ने शैलेश पाण्डेलाई युवतीलाई बलात्कार गरेको आरोपमा पक्राउ गरेको जिल्ला प्रहरी कार्यालय रुपन्देहीले जनाएको छ।

प्रहरीका अनुसार सामूूहिक बलात्कारको घटना भदौ ५ गते घटेको भएपनि शनिबार मात्रै जाहेरी परेपछि उनीहरु पक्राउ परेका हुन् । पक्राउ परेका कर्मचारीसहित तीनै जनाले पीडित युवतीलाई जागिरको प्रलोभन दिएर बलात्कार गरेको आरोप लागेको प्रहरीले जनाएको छ।

रुपन्देही प्रहरीले अदालतबाट म्याद थप गरेर उनीहरुसँँग थप अनुसन्धान सुरु गरेको जनाएको छ।