धनुषाको प्रहरी हिरासतबाट भागेका ६ जना थुनुवा पक्राउ, दुई जना अझै सम्पर्कविहीन

जनकपुर । जिल्ला प्रहरी कार्यालय धनुषाको प्रहरी हिरासतबाट भागेका ८ जना थुनुवामध्ये ६ जनालाई प्रहरीले पक्राउ गरेको छ।  गए राति प्रहरी हिरासतको भेन्टिलेटर फोडेर एकैपटक ९ जना थुनुवा भागेका थिए।

हिरासतबाट ९ जना थुनुवा भाग्दा प्रहरीले भने  सत्यम झा जनकचोकबाट नियन्त्रणमा लिएको थियो। 

धनुषा प्रहरीका अनुसार फरार भएका लागूऔषध मुद्दाका जनकपुरधाम उपमहानगरपालिका -२१ रुपैठाका अमितकुमार झा, धनुषाको विदेह नगरपालिका-७ गिद्धाबेलापट्टीका २६ वर्षीय रञ्जित मण्डल र अभद्र व्यबहार मुद्दाका जनकपुरधाम उपमहानगरपालिका-१ का १७ वर्षीय सुमित मेस्तरलाई पक्राउ परेका हुन् ।

धनु्षा प्रहरीले दिएको जानकारी अनुसार फरार भएका उनीहरुलाई पनि धनुषाको लखौरीबाट पक्राउ गरिएको हो।प्रहरीले आज दिउँसो नै लखौरीबाट लागूऔषध मुद्दाका अभियुक्त धनुषाको विदेह नगरपालिका-७ का २४ वर्षीय रोशन कुमार मण्डल, सिरहा नगरपालिका-१३ का ३३ वर्षीय अभास्कर कुमार यादव र अभद्र व्यबहार मुद्दाका जनकपुरधाम-४ का २२ वर्षीय विक्की कार्कीलाई पक्राउ गरिसकेको छ।

प्रहरीले फरार भएका बाँकि दुई जनाको खोजीकार्य जारी राखेको जनाएको छ। अझैसम्म फरार हुनेमा धनुषाको नगराइन नगरपालिका २ का १८ वर्षीय मनिष मण्डल रफऔरही गाउँपालिका २ का २३ वर्षीय विशाल मुखिया रहेका छन् ।