८ किलो अफिम बोकेर पैदल हिडिरहेको अवस्थामा समातिए दुई युवक

रुकुम पश्चिम। रुकुम पश्चिमबाट प्रहरीले ८ किलो अफिमसहित दुई युवकलाई पक्राउ गरेको छ।

चेकजाँचका क्रममा प्रहरीले जिल्लास्थित आठबिसकोट नगरपालिका-२ स्यालाका ३५ वर्षीय अजय यरी र मुसिकोट नगरपालिका-९ बालचौरका ३६ वर्षीय भिमबहादुर वलीलाई ८ किलो १ सय ग्राम अफिमसहित मुसिकोटको सेरीगाउँदेखि ज्याम डाँडातर्फ पैदल हिँडिरहेको अवस्थामा पक्राउ गरेको जनाएको छ।

रुकुम पश्चिम प्रहरीका अनुसार उनीहरु दुबै जनालाई असोज १८ गते राति पक्राउ गरेर थप अनुसन्धान गरिरहेको जानकारी दिएको छ।

पक्राउ परेका दुबै जनाले यसअघि पनि दाङको तुलसीपुरमा पटकपटक लागुऔषध लगेर भारतीयलाई बिक्री वितरण गर्ने गरेको अनुसन्धानमा खुल्न आएको प्रहरीले जनाएको छ।