ट्यांकरमा तस्करी हुँदै गरेको झण्डै ४ क्विन्टल गाँजा बरामद, चालकसहित दुई जना पक्राउ

काठमाडौं । ट्यांकरमा लुकाएर ल्याइएको झण्डै ४ क्विन्टल  गाँजा प्रहरीले बरामद गरेको छ। जिल्ला प्रहरी कार्यालय मकवानपुरले आज  हेटौंडा उपमहानगरपालिका–१५ स्थित रातोमाटे चेकपोष्टबाट ३९२ किलो गाँजा बरामद गरेको जनाएको छ।

आज पालुङबाट वीरगन्ज जाँदै गरेको ना७  ख १७७१ नम्बरको ट्याांकरभित्र लुकाएको अवस्थामा उक्त गाँजा भेटिएको  मकवानपुर प्रहरीले जानकारी दिएको छ । 

गाँजा तस्करीमा संलग्न रहेका मनहरी घर भएका ट्यांकर चालक २६ वर्षीय रोशन पुरी र सहचालक २२ वर्षीय धनबहादुर मल्ललाई पक्राउ गरेको हो।

मकवानपुर प्रहरीका अनुसार ट्यांकरको ५ वटा डिब्बाहरुमध्ये ३ नम्बर डिब्बामा २५ वटा पोका बनाएर लुकाएको अवस्थामा गाँजा बरामद गरिएको हो । प्रहरीले उक्त घटना बारेमा थप अनुसन्धान गरिरहेको जनाएको छ।