काठमाडौंबाट पौने ४१ लाख रुपैयाँको सुन र जिन्सी चोरेर फरार अन्सारी महोत्तरीबाट पक्राउ

काठमाडौं । काठमाडौंको एक घर र रेस्टुरेन्टबाट लाखौं रुपैयाँ चोरी गर्ने एक युवकलाई काठमाडौं उपत्यका अपराध अनुसन्धान कार्यालयले पक्राउ गरेको छ। 

गत कात्तिक १८ गते बिहान पौने ३ बजे काठमाडौं-४ स्थित यशोदा श्रेष्ठको घरबाट विभिन्न सुनका गहना र सोही स्थानकै ढिडो भात नेपाली व्यञ्जन गृहबाट नगद तथा जिन्सी सामाग्री गरि ४० लाख ७९ हजार ८८० रुपैयाँ बराबरको घनमाल चोरीमा संलग्न १९ वर्षीय सौखत अन्सारीलाई पक्राउ गरेको हो।

काठमाडौं आएर चोरी गरि फरार भएका महोत्तरीको सोनमा गाउँपालिका वडा नं. ७ सुन्दर बजार स्थायी घर भएका अन्सारीलाई खोजतलासका क्रममा जिल्ला प्रहरी कार्यालय महोत्तरी, इलाका प्रहरी गौशालाको सहयोगमा महोत्तरीको सुन्दर बजारबाट बुधबार पक्राउ गरि काठमाडौं ल्याइएको अपराध अनुसन्धान कार्यालयले जनाएको छ।

प्रहरीको टोलीले उनको घर तलासी गर्दा चोरी भएका सुनका विभिन्न गहना, क्यामेरा लगायत अन्य जिन्सी सामाग्री र स्वदेशी तथा विदेशी मुद्रा समेत बरामद गरिएको थियो।

अपराध अनुसन्धान कार्यालयले पक्राउ परेका अन्सारी र बरामद गरिएका सुनका गहना तथा जिन्सी सामाग्रीलाई आबश्यक अनुसन्धान र कारबाहीका लागि जिल्ला प्रहरी परिसर काठमाडौं पठाएको जनाएको छ।