तुलसीपुरको पढ्ढाबाट १ लाख बढी नगदसहित ८ जना जुवाडे पक्राउ

तुलसीपुर । तुलसीपुर प्रहरीले एक जुवाखालमा छापा मारेर ८ जना जुवाडे पक्राउ गर्दै १ लाख रुपैयाँ बढी बरामद गरेको छ। 

तुलसीपुर उपमहानगरपालिका-१० पढ्ढामा जुवा भइरहेको सूचना पाए लगत्तै इलाका प्रहरी कार्यालय तुलसीपुरबाट प्रहरी निरीक्षक प्रकाश थापाको कमान्डमा गएको टोलीले १ लाख ११ हजार ७१० रुपैयाँसहित ८ जना जुवाडेहरुलाई पक्राउ गरेको हो। उक्त जुवाखालबाट प्रहरीले कौडी र तास बरामद गरेको थियो।

इलाका प्रहरी तुलसीपुरका अनुसार पक्राउ पर्नेमा तुलसीपुर – ६ का ५९ बर्षीय चेतलाल बुढाथोकी, सोही स्थानका ४० बर्षीय जिबराज डाँगी, तुलसीपुर-१२ का ५६ बर्षीय तिलक केसी, तुलसीपुर-१२ कै ४३ बर्षीय फिरु चौधरी, तुलसीपुर-१० का ४४ बर्षीय किरणप्रसाद बम, सोही स्थानकै सुदन वली, २९ बर्षीय तिलकराम चौधरी र ४५ बर्षीय कर्ण चौधरी रहेका छन् ।

तुलसीपुर प्रहरीले दिएको जानकारी अनुसार तुलसीपुर-६ का ५९ वर्षीय बुढाथोकीले पढ्ढा गाउँमा स्थानीय पत्तु चौधरीको घरमा कोठा भाडामा लिएर जुवा खेलाउँदै आएको भन्ने गोप्य सूचनाको आधारमा इलाका प्रहरीको टोलीले बिहीबार राति छापा मारेको थियो।

इलाका प्रहरी कार्यालयले पक्राउ परेका जुवाडेहरुलाई जिल्ला प्रशासन कार्यालयबाट म्याद थप गरी जुवा ऐन अन्तर्गतको कसुरमा कारबाही प्रक्रिया अगाडि बढाएको जनाएको छ।